BED & BREAKFAST

La Balia                                        

Su Mont'e Arci ....

Benibennius in su giassu internet de su B&B La Balia (in sardu Sa Dida)

Sceti dus fueddus in limba po si contai de su Bed and Breakfast nostu.

B&B iat bollit nai “letu e ismurzu”…est unu logu innui si donat a crocai e a murzai!!

Su B&B nostu istat in localidadi S. Anna in sa Sardignia centru-otzidentali. Po ci lompi passendi de sa 131, ci bolint 45 minutus de su portu de Casteddu …. duas oras de Olbia e Porto Torres e sceti 10 minutus de Aristanis. Est facili d’agatai poita c’est su cartellu e sa scansada po S. Anna.

Sa domu - prena de lusci e acoliosa - est istetia costruia in mesu a su sattu in su 2010 chenze strupiai su logu e imperendi materialis chi non arrovinant sa natura.

Su B&B nostu tenit duas camaras cun su bassinu. Una camara cun dus letus de una piatza, s’atra cun unu letu a duas piatzas e un atru letisceddu chi podit fai puru de setzidorgiu bonu (divanu).

S’intrada po is camaras est a una parti po contu suu: aici est prus comudu e prus tranchillu po is istrangius.

In sa lolla chi portat a s’intrada c’est friscura e pasci: inguni si podit stentai cun presceri, mancai ligendi e papendi s’ismurtzu fatu de sa meri de domu!!

Teneus una biblioteca pitia cun librus po mannus e pipius. In sa domu ci funt puru giogus po is pipius chi podint giogai cun su pipiu nostu e assoru de su B&B c’est una pratza cun giogus.

In su B&B non si podit pipai in is camaras e in is logus serraus. Is animalis non podint abarrai aintru de sa domu e si podint aguantai sceti canis pitius accappiaus.

Seus assoru de su mari, ci bollint sceti desci minutus po lompi a Sassu e Aba Rossa. Chini tenit gana de fai cancunu chilometru (passu) in prus podit biri is praias meda bellas de s’Oristanesu.

Su B&B est assoru de Monti Arci e si podit passillai in su padenti. Si podit andai a cuaddu (a cincu chilometrus du est su Circolo ippico l'Usignolo), caminai (fai trekking) e andai in bicicreta (mountain bike) in is andonzus de Monti Arci.

In sa Provintza de Aristanis est prenu de biddisceddas e ci funt sempri festas.

In s’istadi faint meda ispetaculus e faint biri is filmis in is logus obertus: po ndi sciri de prus, tocat castiai su giassu internet Asuni Film Festival e "Film sotto le stelle" (in limba si narat Film asuta is stedhus) in Aristanis.

Paolo Fresu in is mesis de lamapadas e argiolas at a sonai in medas biddas de sa Sardinia: po ndi sciri de prus, tocat castiai su giassu internet www.dromosfestival.it....a sa meri de domu prascit meda su jazz e si podit cunsillai is logus prus assoru de is concertus.

Ci funt una surra de logus bellus medas de biri, assoru de su B&B c’est Tharros, su Nurasci de Losa e cussu de Barumini.

Po su papai…. sa meri de domu manigiat s’ismurtzu cun cosas bonas e friscas!!... chi da precontais prima, issa si podit cuscinai pratus de sa zona.

Pagu attesu de su B&B c’est unu ristoranti chi cuscinat cosas bonas e in is biddas de custa zona si podit tastai ogni’arratza de mandigu!!... Chi si fait presceri, nous si podeus donai cancunu cunsillu po su papai bonu de sa terra nosta!!

Is pretzius

De su mesi de cabudanni a su mesi de abrili € 25,00 po cristianu in sa stanza cun dus letus, € 30,00 in sa stanza cun unu letu.

De su mesi de maju a su mesi de austu € 30,00 po cristianu in sa stanza cun dus letus, € 35,00 in sa stanza cun unu letu.

Is pipius de 7 – 12 annus pagant unu pretziu prus pitiu (sa metadi), is pipius fintzas a 6 annus in su letu cun su babbu e sa mamma non pagant nudda.

Is pretzius pagant s’ismurzu.

Is stanzas ant a essi limpiadas ognia dì.

Po s’accumpagiai de s’aeroportu o de su portu de Casteddu a su B&B o de su B&B a s’aeroportu o a su portu de Casteddu € 20,00. Po s’accumpagiai de s’aeroportu o de su portu de Olbia, Porto Torres e Alghero a su B&B o de su B&B a s’aeroportu o a su portu de Olbia, Porto Torres e Alghero € 30,00